Bloggi þessu verður brátt lokað. Ég er nú að láta af störfum sem forvarnafulltrúi MA eftir 10 ára starf og fer nú að einbeita mér að íslenskukennslunni. Að sjálfsögðu mun ég halda áfram að flétta forvarnir inn í kennslu enda smellpassa þær t.d. inn í Hávamál þar sem varað er við ofdrykkju og hvers kyns óhófi.

Lifið heil.

Stefán Þór

Enn á ný má óska nemendum MA til hamingju með árshátíðina. Þetta er stórbrotin hátíð og vímulaus án gæsalappa og sýnir svo ekki verður um villst að ungt fólk þarf og vill vímulausan kost. Gamaldags sveitaballamenning á að geta vikið um stund fyrir metnaði, dugnaði, fegurð, glæsileika, stolti og sannri gleði. Það er vonandi að allir framhaldsskólar geti boðið upp á hliðstæðan kost því nóg er af annars konar líferni utan ramma skólans.

Að þessu sinni missti ég af árshátíðinni en hef heyrt margar sögur og flestar góðar. Allmargir hafa reyndar haldið því fram að aðalhljómsveit kvöldsins hafi ekki verið í takti við anda árshátíðarinnar og það sama hafi jafnvel gilt um tvo gesti. Ég er ekki í nokkurri aðstöðu til að fullyrða neitt í þeim efnum en vissulega hefur vímuefnaneysla hljómsveita verið hvimleitt vandamál og þeir sem borga milljón fyrir nokkur lög eiga skilyrðislaust að gera skriflegar kröfur um ákveðinn standard. 

Fyrirsögnin hljómar kannski eins og argasta útlenska en Alateen er unglingahópur aðstandenda alkóhólista og eru unglingarnir á aldrinum 13-18 ára. Samtökin verða með fasta fundi í Rósenborg - gamla barnaskólahúsinu. Fundirnir verða alla mánudaga kl. 18:30 til 19:30 og verður fundarsalurinn opnaður kl. 18:00. Fyrsti fundurinn verður haldinn mánudaginn 26. nóvember 2007.

Nemendur 18 ára og yngri sem búa við það að foreldri, maki eða annar náinn ættingi eða vinur er alkóhólisti/fíkill geta fengið góðan stuðning og fræðslu á þessum fundum. Hafa ber í huga að alkóhólismi er fjölskyldusjúkdómur og aðstandendum líður oft mjög illa og þurfa svo sannarlega á styrk að halda.

Í dag er forvarnadagurinn í grunnskólunum og er það hið besta mál. Heimilin og grunnskólinn verða að halda vel utan um börnin, efla samkennd, skipulagðar tómstundir og heilbrigt félagslíf ásamt því að fræða á fordómalausan hátt um fíkniefni. Megi allir dagar verða forvarnadagar.

Hér í MA höfum við ekki lagt áherslu á sérstaka daga eða upphróparnir og átök síðustu ár heldur byggir hugmyndafræðin á því að selja kennurum og nemendum þá hugmynd að forvarnir og heilbrigt félagslíf séu eðlilegur þáttur í skólastarfinu. Þessi hvatning verður ekki síst að koma innan frá og til allrar hamingju er það metnaðarmál nemenda að halda vímulaus busaböll og árshátíð. Margt fleira jákvætt mætti nefna í þeim dúr.

Glíma, forvarna- og gleðifélag nemenda, verður með fund í dag kl. 15.05 og eru allir sem áhuga hafa á málinu hvattir til að mæta í H6. 

Haustfundur forvarnafulltrúa framhaldsskólanna var haldinn í Fjöltækniskólanum í Reykjavík síðastliðinn föstudag. Þar voru einnig mættir nokkrir félagsmálafulltrúar og sömuleiðis nemendur. Ég flutti þarna erindi um forvarnastarfið í MA undangenginn áratug og hvernig það hefði þróast. Arna B. Baldvinsdóttir, fyrrum Glíma-kona og núverandi laganemi, var mér til fulltingis og sagði frá reynslu sinni af Glíma og hvernig mætti nota hugmyndafræðina í grunnskólum og framhaldsskólum. Vakti innlegg hennar verðskuldaða athygli.

Í umræðum og fyrirspurnum var mikið horft til MA og spurt út í félagslífið, böllin, árshátíðina, Glíma o.s.frv. Vilja margir sækja hingað fyrirmyndir og er það hið besta mál. Auðvitað ættu skólaskemmtanir, s.s. böll á vegum skólanna, að vera vímulausar, alltaf og alls staðar. Það er of mikið um gæsalappir í þessum geira.

Að sjálfsögðu kom ég líka inn á ýmislegt sem betur mætti fara í MA. Það er t.d. ólíðandi að nýnemar byrji að drekka undir þrýstingi í svokölluðum busapartíium og stórfurðulegt að fjórðu bekkingar geti ekki látið það eiga sig að halda krökkunum fylleríssamkvæmi. Þetta lýsir a.m.k. ekki frumleika eða heilbrigðri hugsun. Einnig er leiðinlegt að sjá fólk reykja á skólalóðinni eða við lóðarmörk og koma svo angandi inn í tíma. Annað hvort er MA reyklaus vinnustaður eða ekki. Það sama gildir um munntóbak. Tvær aðvaranir og síðan brottrekstur, er það málið?

Smá ábending til þeirra örfáu nemenda sem eru háðir tóbaki. - Ég nenni ekki angra meirihluta nemenda með tóbaksfræðslu enda ætti skaðsemi efnisins að vera öllum ljós núna og við getum ekki notað sömu afsökun og amma og afi, sem vissu ekki betur. Samfélögin í hinum siðmenntaða heimi úthýsa tóbaksreyk og það verður erfitt að lifa við þessa fíkn í framtíðinni, s.s. að fá vinnu eða finna stund og stað til að svala fíkninni.

Ég þekki það vel af eigin reynslu að það getur verið erfitt að hætta að reykja. Hitt veit ég líka af fjölmörgum dæmum að langbest er að losa sig strax úr þessum fjötrum. Þetta verður bara verra með árunum. Því hvet ég tóbaksfíklana til að koma til mín og spjalla. Það sakar ekki að fá ráð og stuðning. Auðvitað margborgar það sig, á öllum sviðum, að nota ekki tóbak. Það hlýtur að vera ljóst, ekki satt?

Hafið samband á stefan@ma.is og við finnum okkur tíma til að rabba saman.

Nemendur geta alltaf átt von á því að einhver, jafnvel kunningi, víki sér að þeim og bjóði þeim meinleysilega pillu. Oft eru þessar töflur með broskalli eða annarri mynd á eða töff áletrun á borð við 007. Pillurnar eru sagðar frábært stöff sem fær mann til að dansa tímunum saman í teknó-transi og oft fylgja aðrar tröllasögur af þessu undralyfi með. Hér er ég að tala um e-pilluna.

Þótt ég hafi prófað margt um dagana hef ég ekki prófað e-pillu. Mér hefur ekki staðið slíkt til boða, sennilega vita sölumenn að ég er of skynsamur til að þiggja svona pillu. Markaðssetningin beinist að ungu og óreyndu fólki. Ég myndi heldur aldrei leggja í það að gleypa e-pillu. Rannsóknir og reynsla annarra nægja mér. 

Þeir sem selja e-pillur gleyma víst að auglýsa smáa letrið, sem í mínum augum er stóra letrið. Afleiðingarnar. Það er reyndar ekki pottþétt að maður fari yfir um af einni töflu en þó eru dæmi um slíkt. Stundum þarf ekki nema eina töflu. Og hér erum við að tala um örvandi, amfetamínskylt efni sem örvar hjartslátt, hækkar blóðþrýsting og líkamshita og fólk getur hreinlega (og hefur) dáið af ofhitnun. Hitt er kannski enn lúmskara að eftir að hafa náð hinum örvandi hæðum kemur mikil lægð, oft svartasta þunglyndi og sjálfsvígshætta eykst gríðarlega. Að kaupa sér gervigleði eina kvöldstund með hugsanlega viðvarandi þunglyndi er allt of dýrt.

Lögregla og landlæknir vara við auknu framboði á e-pillum og við tökum undir öll varnaðarorð í sambandi við þetta háskalega eiturlyf. Hafið endilega samband (stefan@ma.is) ef þið viljið meiri upplýsingar eða hafið áhyggjur af því að e-pillur séu í umferð. Sjá líka tengla og umræður á http://www.lydheilsustod.is 

Forvarnastarfið í MA er að sjálfsögðu hafið og eru viðtalstímar forvarnafulltrúa á mánudögum í kjallara Gamla skóla kl. 15.30-16.30. Einnig er upplagt að senda tölvupóst á stefan@ma.is.

Vinna við bækling um forvarnastarfið og þá sérstaklega félagið Glíma er nú á lokasprettinum. Fundur verður í Glíma fimmtudaginn 18. október kl. 16.10 í stofu H6. Allir nemendur eru velkomnir, gamlir og nýir félagar.

Nemendur geta fengið einingu fyrir þátttöku. Áherslurnar í vetur eru a) fordómalaus fræðsla og umræður um vímuefni, b) styrking sjálfsmyndar með æfingum og leikjum, c) áhersla á heilbrigt félagslíf í skólanum, d) vangaveltur um þá staðreynd að við eigum val og reynum að velja betri leiðina, e) heimsóknir í grunnskóla með fræðslu og spjall.

Minni líka á netfang Glíma - glima@ma.is

Þau tíðindi hafa gerst að gamli Glíma formaðurinn Anton Sigurður Magnússon er orðinn varaformaður Hugins. Hljómar það afskaplega vel og væntir forvarnafulltrúi þess að nú takist gott samstarf milli hans, Glíma og stjórnar Hugins um að vinna sameiginlega að því að bæta enn skólabraginn. Við höfum svo sem áður átt góða að, þegar Glíma stúlkan Edda Hermannsdóttir var formaður og fleiri góða samstarfsmenn mætti nefna.

Ef einhver skyldi ekki vita hver þessi Anton er þá er það hann sem er hérna á myndunum með gasgrímuna. 

Af Glíma er það að frétta núna að heimsóknir í 7. bekk grunnskólans standa fyrir dyrum. Þegar er búið að skipuleggja ferðir í Glerárskóla og þá hafa Brekkuskóli og Lundarskóli sýnt áhuga. Næsta haust er ráðgert að fara í 10. bekki til að spjalla við verðandi framhaldsskólanema og gera þeim grein fyrir að í framhaldsskóla tíðkast líka heilbrigt og vímulaust félagslíf. Það er nefnilega hjátrú og bábilja að menn þurfi að hrynja í það ef þeir byrja í framhaldsskóla. 

Gott fólk. Gleði- og forvarnafélagið Glíma er farið að starfa af krafti. Markmiðin eru sem fyrr að fræðast og fræða um vímuefni, stuðla að sterkri stjálfsmynd og heilbrigðu félagslífi. Hófsemi og skynsemi í bland við gáska og gleði er okkar leiðarljós og slagorð okkar er m.a. þetta: Þú átt val.

Nú væri gott að fá enn fleiri félaga í hópinn, sérstaklega stráka því við þurfum jú fyrirmyndir af báðum kynjum. 

Ég vil senda hlýjar jóla- og nýárskveðjur til allra forvarnafulltrúa framhaldsskólanna, starfsmanna hjá Fræðslumiðstöð í fíknivörnum og Lýðheilsustöð og forvarnafulltrúa Akureyrarbæjar með þökk fyrir góðar kveðjur og samstarf á líðandi ári. Nemendum og starfsfólki MA flyt ég óskir um gleðilegt ár og að sjálfsögðu fá félagar mínir í Glíma sérstakar kveðjur og þakkir fyrir frábært starf.

Þörfin fyrir forvarnir er brýn, eins og öllum ætti að vera ljóst af nýlegum fréttum af dauðsföllum og vargöld víða á landinu í tengslum við fíkniefni. Fikt getur hæglega leitt til fíknar og leiðin er oft ótrúlega stutt. Þeir fjölmörgu einstaklingar sem hafa látið lífið, beint eða óbeint, af völdum áfengis, tóbaks, lyfja og ólöglegra fíkniefna voru einhvern tíma í þeim sporum að eiga val. Þeir völdu fiktið.

Margir sem byrja að fikta ánetjast og átta sig ekki á afneituninni og sjálfsblekkingunni sem fíknin hefur í för með sér. Þeir telja sig hafa stjórn á neyslunni og segjast geta hætt hvenær sem er. Þeir muni aldrei lenda í neinu rugli… bara einhverjir aðrir.

Ágætu nemendur Menntaskólans á Akureyri.

Enn er knýjandi að sameinast í varnarbaráttu fyrir heilbrigðu skólasamfélagi. Langsterkasta aflið kemur innan frá, frá ykkur sjálfum. Ég vona að við getum öll unnið saman að því að velja heilbrigða valkosti og aðstoða þá sem lenda á villigötum. Nemandi sem mætir skakkur eða spíttaður í skólann er ekki töffari, ekki fífl, heldur sjúkur einstaklingur. Hann þarfnast aðstoðar. Hann hefur misst tökin á tilverunni jafnvel þótt hann þykist enn hafa fulla stjórn á neyslunni og geti hætt hvenær sem er. Þessi nemandi er á útleið.

Ég vil að allir fái séns en verði ekki umsvifalaust sparkað eða skrópi og dópi sig úr skóla. Leitið til mín eða námsráðgjafa, umsjónarkennara, skólameistara, vina eða beint til ráðgjafa á göngudeild SÁÁ ef þið hafið áhyggjur af eigin neyslu eða annarra. Ekki sýna afskiptaleysi og óbeint hjálpa fíklunum að þróa sjúkdóm sinn enn frekar með því að ,,kóa" með þeim. Þeirra mesta lán er að rekast á vegg nógu snemma. Við getum hæglega hjálpað hvert öðru. Hér hafa nemendur stofnað forvarnafélagið Glíma og skólayfirvöld og stjórn Hugins á hverjum tíma legga áherslu á úrval af vímulausum skemmtunum, sem er nauðsynlegt val á móti öllu hinu sem býðst út um allan bæ.

Nú er árshátíð framundan, hátíð sem hefur vakið verðskuldaða athygli og verið öðrum skólum fyrirmynd í því að bæta félagslífið. Ég vona og veit að þetta verður glæsileg samkoma. Höldum áfram að vera stolt af okkur sjálfum og skólanum okkar. Þetta er allt undir okkur komið.Við eigum val.